Il-laqgħa tal-MEPA dwar Ħondoq ir-Rummien “toħloq ħafna tħassib”

Pubblikata fuq l-Orizzont nhar l-Hamis 3 ta' Gunju, 2010.

Fi stqarrija għall-istampa, l-għaqda Żminijietna – Leħen ix-Xellug, iddeskriviet il-laqgħa pubblika tal-Awtorità Maltija għall-Ambjent u l-Ippjanar (MEPA), dwar il-proġett ta’ Ħondoq ir-Rummien bħala ta’ tħassib, fejn ħalliet ħafna mistoqsijiet mhumiex imweġbin. L-għaqda sostniet li l-fatt li fl-2006, l-abbozz tal-pjan lokali tal-2002 ġie mibdul minn żona ta’ afforestazzjoni, ta’ tisbiħ u ta’ faċilitajiet rikreattivi għal wieħed turistiku u ta’ faċilitajiet marittimi, mingħajr ebda konsultazzjoni pubblika, iqajjem tħassib kbir.

Ingħad ukoll li l-MEPA ftit snin ilu rrifjutat l-iżvilupp propost ta’ “Cruiseliner Passenger Terminal” fl-Imġarr minħabba diversi konsiderazzjonijiet ambjentali, fosthom li ż-żona tilqa’ fiha speċi protetti, fosthom ta’ alka magħrufa bħa–la ‘Posedonia meadow’. “Għaldaqstant wieħed jistaqsi għal liema raġuni Ħondoq ir-Rummien mhux qed jingħata l-istess trattament mill-MEPA, meta l-istess speċi protetta tinsab ukoll fil-Bajja ta’ Ħondoq ir-Rummien u hija mhedda bl-iżvilupp ta’ yacht marina?” staqsiet l-għaqda. “Ir-rapport dwar l-impatt ta’ Traffiku (TIS) mill-proġett propost ta’ Ħondoq ir-Rummien għadu ma ġiex iffinalizzat u ppubblikat, u ta’ dan wieħed jistaqsi, għaliex informazzjoni ta’ interess pubbliku ma ġietx ippubblikata la dakinhar tal-laqgħa pubblika u lanqas ingħatat kopja lill-Kunsill?” Apparti minn hekk, ir-Referendum li kien sar fl-2002 wera biċ-ċar li 85% tal-Poplu tal-Qala qal li ma jaqbilx ma’ dan il-proġett ta’ Ħondoq ir-Rummien, l-istess proġett li llum qed jitressaq għad-diskussjoni. Il-maġġoranza tal-Kunsill huma wkoll kontra l-proġett ukoll. Żminijietna – Leħen ix-Xellug appellat lill-MEPA biex tirrifjuta awtomatikament l-iżvilupp propost għall-fatt li l-bajja hi waħda ekoloġikament sensittiva u ta’ użu pubbliku għall-għawm. “L-iżvilupp propost ta’ yacht marina se jeqred waħda mill-isbaħ bajjiet nodfa li hi aċċessibbli fil-Gżejjer Maltin,” temmet tgħid l-istqarrija.